Додека нападот врз Иран, кој го започнаа САД и Израел, продолжува, но и одговорот на Иран во форма на напади врз соседните земји кои ја поддржуваат таа агресија, и спортот и како се чувствуваат последиците од новата ситуација. Дури и во европска земја.
Имено, повеќе од 170.000 холандски граѓани потпишаа петиција со која се повикува нивната национална фудбалска репрезентација да го бојкотира Светското првенство во 2026 година во САД, Канада и Мексико поради политиките на американскиот претседател Доналд Трамп.
Неколку членови на долниот дом на холандскиот парламент добија петиција од телевизискиот продуцент и новинар Теун ван де Кеукен.
„Бојкотирајте го Светското првенство на Трамп“, гласеше пораката што им ја предаде.
Петицијата, која во моментот на поднесување имаше повеќе од 170.000 потписи, ги повикува холандскиот национален тим и службените лица да не учествуваат на турнирот.
Ван де Кеукен беше директен во својата критика: „Владата на Трамп ја поткопува демократијата и го фрла светот во криза. Присуството (на Светското првенство) би го легитимирало тој режим“.
Текстот на петицијата е уште поостар:
„Неприфатливо е нашите фудбалери да одат на турнир организиран од претседател кој се заканува дека ќе нападне сојузник. Учеството во спортски настан како ништо да не се случува ја легитимира експанзионистичката политика на Трамп“.
Петицијата продолжува со следниве зборови: „Не сакаме да ја поддржиме насилната терористичка политика на Трамп против невините мигранти. Нека нашата земја биде на вистинската страна од историјата. Чувајте ги нашите момчиња дома.“
Иницијативата првично беше покрената како одговор на заканите на Трамп за употреба на „прекумерна сила“ за анексија на Гренланд, територија под данска администрација. Лидерите на НАТО беа цврсто против каква било американска окупација и, да бидеме искрени, плашливо распоредија трупи во регионот што ѝ припаѓа на Данска.
Како одговор, Трамп се закани со повисоки тарифи за осум земји – Велика Британија, Франција, Германија, Данска, Норвешка, Шведска, Холандија и Финска.
Ван де Кеукен призна дека ефикасноста на бојкотот е дискутабилна.
Осврнувајќи се на претходните турнири во „проблематични режими“ каде што учествуваше Холандија, тој рече: „Подоцна можеби ќе сфатите дека сте биле на погрешната страна од историјата.“
Холандската фудбалска асоцијација (KNVB) објави дека нема непосредни планови да го преиспита учеството на Холандија на Светското првенство. Сепак, асоцијацијата додава дека „внимателно ги следи геополитичките случувања и останува во консултација со холандската влада“.