Денес на стадионот на ФК Работнички во Градскиот парк во Скопје се одржаа финалните натпревари од годинешниот „Кока кола“ фудбалски Куп на Македонија, кој е дел од глобалниот настан под покровителство на Светската фудбалска федерација (ФИФА).
Во заедничка организиација на Пивара Скопје АД, „Кока кола“ и Отворените забавни фудбалски школи, на терените на ФК Работнички продефилираа над 1.500 момчиња и девојчиња од 100 основни и средни училишта од 12 општини во Македонија.
На учесниците во финалните натпревари им беа доделени златни медали, но единственоста на Кока кола купот е тоа што сите учесници се победници.
Основната цел на проектот е активно вклучување и практикување физички активности кај децата преку забава и дружење, како и создавање навики за здрав животен стил и спортски дух уште од школски денови.
Значењето на проектот го истакна и Ѓорѓи Христов, регионален претставник на Компанијата Кока кола.
– Во системот на „Кока-кола“ веруваме дека нашиот бизнис може да биде одржлив и здрав исто колку што е општеството на кое што му служиме. Затоа, даваме особено значење во создавањето млади генерации свесни за улогата на здравите животни навики. Проектот покрај промоцијата на спортот и физичката активност, нуди одлична можност за стекнување нови пријателства и негувањето семејни вредности, изјави Христов.
Покрај натпреварите во фудбал, беа организирани и разновидни спортски и забавни игри во кои беа вклучени членовите на семејства на учесниците на купот и нивните другарчиња, со што настанот прерасна во единствено доживување за сите вклучени страни.
„Кока-кола“ купот во Македонија се одржува веќе трета година по ред.