Андреа Пирло е новиот селектор на италијанската фудбалска репрезентација. Официјална потврда се очекува во понеделник или вторник, а според информации од повеќе извори, договорени се сите детали од четиригодишниот договор.
Светскиот шампион со Италија од 2006 година и европски вицешампион од 2012 година ќе ја предводи репрезентацијата со годишна плата од 1,5 милиони евра.
Пирло стана главен кандидат откако Карло Анчелоти и Пеп Гвардиола ги одбија понудите да ги преземат „Аѕурите“. Анчелоти неодамна потпиша нов договор со Бразил, а Гвардиола изјави дека по десет години во Манчестер Сити, сака да се посвети на семејството. Наводно, тој побара годишна плата од 20 милиони евра за да седне на италијанската клупа.
Пирло веднаш ја прифати поканата на техничкиот директор Паоло Малдини и специјалниот советник Леонардо, со кои има долгогодишна соработка уште од времето додека беше во Милан.
Според медиумските извештаи, Пирло ќе потпише договор што ќе важи до крајот на Светското првенство во 2030 година. Неговата плата од 1,5 милиони евра годишно беше клучен фактор во преговорите, особено во споредба со барањата на Гвардиола.
Официјалното соопштение ќе уследи откако Пирло се согласи да го раскине договорот со клубот „Јунајтед ФЦ“ од Обединетите Арапски Емирати, кој го презеде минатото лето. Италијанската фудбалска федерација има состанок во вторник, кога се очекува и официјално претставување.