Најдобриот тенисер на светот Роџер Федерер рече дека му е потребен одмор и дека не знае дали и уште колку турнири ќе игра до крајот на сезоната.
Првиот рекет има 1355 бодови повеќе од Новак Ѓоковиќ, а до крајот на сезоната би требало да игра на Мастерсот во Шангај и Париз, турнирот во Базел и завршниот Мастерс куп во Лондон.
„Одмор ми е многу потребен. Уморен сум и исцрпен и потребно ми е да се одморам и да видам што понатаму. Не сум одлучил за остатокот од сезоната, но морам да одлучам кој турнир ми е важен“, изјави Федерер.
Швајцарецот би требало да ги брани титулите во Париз, Базел и Лондон, а сосема е извесно дека во Шангај нема да игра.
Минатиот викенд Швајцарија ја совлада репрезентацијата на Холандија во борба за место во светската група на Дејвис купот, а Роџер на својот тим му донесе два бода.
„Дејвис купот за мене не е приоритет. Поважно ми е да бидам со своите соиграчи, уживам кога сум со нив, тоа се моите најдобри пријатели“, додава Федерер.