Македонската ракометна репрезентација го доживеа највисокиот пораз во настапите на светските првенства. Загуби катастрофално од домаќинот на мундијалот, Египет со 38-19 во вторто коло од прелиминарниот сегмент.
Катастрофата беше најавена во првото полувреме во кое до 15. минута нашиот тим имаше постигнато само три гола, вкупно до крајот од полувремето постигна шест и на паузата губеше со 20-6. Во овој дел од натпреварот, нашиот тим остана без Филип Кузмановски кој доби црвен картон.
Во вториот дел макеоднските репрезентативци го продолжија лошото издание и селекцијата на Египет имаше и највисока предност од 23 гола. Лазаров, Пешевски и Марковски со по три гола беа најефикасни во македонската репрезентација.
По два одиграни натпревара, нашиот национален тим е без бодови, со два пораза и со уште еден натпревар за одигрување. Во третото коло ќе игра против селекцијата на Чиле. Со успех на тој дуел в понделник, македонската репрезентација би обезбедила пласман во следната фаза на Светското првенство.