Агенцијата за млади и спорт ќе биде генерален покровител на Шаховската олимпијада за слепи лица. Ова е договорот меѓу челните луѓе на Националниот сојуз на слепи и Агенцијата за млади и спорт, постигнат денеска.
Претседателот на националната спортска федерација на слепи Коце Димов, претседателот на националниот сојуз на слепи на Република Македонија Жарко Селковски, како и генералниот секретар на националниот сојуз на слепи Стерја Димов беа гости во Агенцијата за млади и спорт, каде со директорот Марјан Спасески разговараа околу организациските активности поврзани со претстојната Шаховска олимпијада за слепи и визуелно хендикепирани лица, која од 18-29 јуни ќе се одржи во Охрид. На овој настан ќе настапат околу 300 учесници од 30 држави од светот.
Агенцијата за млади и спорт се јавува како главен покровител на олимпијадата, за која од својот буџет издвои 1,8 милиони денари.