Американската телевизиска репортерка Абигејл Велез јавно им се извини на граѓаните на Босна и Херцеговина и на фудбалската репрезентација, откако нејзината изјава во пресрет на натпреварот од нокаут-фазата на Светското првенство предизвика бројни негативни реакции.
Велез преку социјалните мрежи призна дека нејзиниот настап бил непромислен и несоодветен.
„Во неуспешен обид да внесам малку забава во духот на Светското првенство, отидов предалеку и дадов непромислен коментар кој беше нечувствителен и несоодветен. Им се извинувам на народот на Босна и Херцеговина и на фудбалската репрезентација. Светското првенство треба да ги обединува луѓето ширум светот, а мојот коментар не го одразуваше тој дух. На сите репрезентации им посакувам успех во продолжението на турнирот“, напиша таа.
Контроверзиите започнаа по нејзиното јавување во живо од Лонг Бич, кога во пресрет на дуелот меѓу САД и Босна и Херцеговина изјави дека „не знае многу за Босна“ и дека „не би знаела да ја покаже на карта“, по што додаде: „Подготви се, Босно, доаѓаме“.
Снимката брзо се прошири на социјалните мрежи и предизвика бројни критики, при што многумина оценија дека ваквиот настап е непрофесионален, особено во пресрет на натпревар од елиминациската фаза на Светското првенство.
Репрезентацијата на Босна и Херцеговина годинава го оствари својот најголем успех на мундијалите, обезбедувајќи пласман во нокаут-фазата, каде во осминафиналето ќе се соочи со селекцијата на Соединетите Американски Држави.