Жена загина во пожар во станбена зграда во центарот на Софија, објавија бугарските медиуми.
Пожарот избувна рано утринава во 2:20 часот во станбена зграда во центарот на бугарската престолнина. На местото на настанот веднаш се испратени возила на брзата помош и на противпожарните служби.
Министерството за внатрешни работи на Бугарија соопшти дека пожарот го предизвика психички болно лице.
Според службите за итни случаи, починатата жена е на 42 години.
Повредени се 9-годишно момче и две девојчиња, на 2 и 11 години.
Тие се примени во болницата „Пирогов“, а 41-годишен маж и 71-годишна жена се примени во Воено медицинската академија.
Човекот што го подметна пожарот е уапсен. Тој е во добра состојба.