Александар Вучиќ денеска оцени дека суштината на „Студентската листа“, како што рече, „е да ги укине сите традиционални вредности на Србија“ и дека веќе никој во Србија не е безбеден.
Како што наведе, претставниците на „Студентската листа“ „сакаат да го променат календарот, односно Србите да го прифатат Грегоријанскиот наместо Јулијанскиот календар“.
„И кога ќе ви кажат: ’Ние ќе избираме такви и такви епископи‘ – а тоа ви го вели некој што би требало да стане претседател на Републиката во оваа земја – тогаш, навистина, не знам каков друг коментар би можел да дадам. Тоа се луѓе кои тврдат дека епископот Николај е исто што и Алојзије Степинац. И, се разбира, сакаат да го променат нашиот календар, за да не го славиме Божиќ на 7 јануари, а Бадник на 6 јануари, туку да бидеме како сите други, да не се разликуваме во ништо, при што сè што претставува наши традиционални вредности целосно би исчезнало. А сето тоа е дел од еден многу поширок план“, изјави Вучиќ.
Тој вели дека во претстојниот период, како што наведе, „пред сè, за нив ќе настапи тешко време за живеење“.
„Но, ако сте доволно силни, доволно цврсти, не постои ништо што може да опстане, а да не го победите. Единственото нешто што е важно е нечија волја. Мојата идеја, мојата идеологија е љубов кон Србија и кон земјата – толку голема, што ништо не може да ме скрши и ништо не може да ме исплаши. Како што гледате, сиве овие денови им се смеам в лице, бидејќи знам колкава штета ѝ нанесуваат на земјата. Не разбирате – овие 10 дена ѝ нанесоа поголема штета на земјата отколку нивните половина година бесмислени протести, кои служеа само за уништување на оваа земја“, рече Вучиќ.
Тој изјави вечерва дека уште во ноември ќе се забележи пад на домашниот ДДВ и дека Србија, која требаше да биде економијата со најбрз раст, следната година ќе падне на четврто, петто или шесто место, а можеби и подолу.
Вучиќ додаде дека проблемот е во тоа што оној што ја води земјата мора да знае што е реално, што е сериозно, што е одговорно, а што не.
„Ова се работи поради кои Србија ќе остане гладна. Тие уште денес велат дека ’Експо‘ не е важно. А сега е потребно да се пристапи кон големи набавки. Но, не може да се пристапи кон големи набавки, бидејќи веднаш ќе речат дека станува збор за некаква корупција, или што знам што друго. Ако не се пристапи кон големи набавки во овој момент, од ’Експо‘ нема да биде ништо. Значи, објективно гледано, од ’Експо‘ нема да биде ништо, бидејќи тие нема да го реализираат“, рече Вучиќ.