Претседателот на Србија, Александар Вучиќ, денеска упати остра порака и рече дека не жали што Марта Кос – европската комесарка за проширување ја откажала посетата на Србија.
„Како причина наведе кратко, но глупаво објаснување – величењето на генералот Младиќ, но не кажа кој го величел. Но, кога немаат ништо друго, тогаш спомнуваат сè“, рече Вучиќ.
Тој ја праша европската комесарка за проширување дали треба да им се забрани на луѓето да присуствуваат на погребот на Младиќ, да не се регулира сообраќајот и слично.
Потоа упати и остра порака:
„Тие не ја разбраа најдобро пораката на српскиот народ. И да се тргне настрана приказната за Младиќ, не разбираат колку на српскиот народ му е доста од лаги, одземање територии и ослободителни пресуди.“
Вучиќ изјави дека очекува и еден вид ослободителна пресуда за Хашим Тачи, а за Марта Кос дополнително рече дека „таман сакал со неа да разговара како за четири години ќе разговараат за кластерот 3, како и дека повторно ќе мора да разговараат со него бидејќи СНС ќе победи на изборите“.
„Мене Марта Кос нема да ми држи лекции кој е воен злосторник, кој е монструм, а кој не е“, нагласи Вучиќ и потсети на усташките извици „За дом спремни“ во земја членка на ЕУ, на кои, како што рече, никој не реагира.