Во сообраќајната несреќа што се случи утринава околу 5.35 часот на автопатот А4 во правец кон Загреб, меѓу Јарек Бишашки и Подворац каде полски автобус излета од патот, загинаа 12 лица, а 31 се повредени, од кои дел потешко, соопшти хрватскиот министер за полиција Давор Божиновиќ.
Во несреќата на лице место загинале 11 лица, а 32 се згрижени во болниците во Вараждин, Загреб и Чаковец.
– За жал, во меѓувреме почина уште едно лице кое беше згрижено во болница, така што во овој момент имаме 12 лица кои ги загубија животите во оваа сообраќајна несреќа – додаде Божиновиќ.
Станувало збор за група која планирала да оди на аџилак во Меѓугорје, рече министерот и додаде дека за несреќата бил информиран премиерот Андреј Пленковиќ.
Според информациите на полските медиуми, меѓу патниците во автобусот имало 3 свештеници и 6 калуѓерки.