Возилата на три амбасади во Црна Гора се најдоа во улога на „заложници“ поради нерешен правно-имотен спор меѓу подгоричкото семејство Вучевиќ и Дирекцијата за имот на главниот град, јави Танјуг.
Возилата на амбасадата на Босна и Херцеговина, Словенија и Франција кои се наоѓаат во Атинска улица на брдото Горица, над осум часа биле блокирани со камион кој во целост го парализирал сообраќајот, а проблемот бил решен кога дигалка го однела камионот.
Амбасадите се наоѓаат на парцела која припаѓа на Вучевиќ, каде уште во 1992 година изградена е улица Атинска. До блокада дошло бидејќи Дирекцијата за имот ниту после 22 години не ја исплатила договорената сума за експропријација на земјиштето на кое е изградена улицата.