Србија денеска ќе биде сведок на првиот изборен тест за рејтингот на актуелната власт на локално ниво по општествено-политичката криза предизвикана од трагедијата на железничката станица во Нови Сад, која по 1 ноември минатата година предизвика бран протести и барања на студентското движење за воспоставување на регулирана правна држава.
Станува збор за локални избори во малата општина Косјериќ на запад од земјата и градот Зајечар на исток, и иако на прв поглед, со вкупно нешто повеќе од 55.000 гласачи, изборите не изгледаат премногу значајни, ова ќе биде прва пресметка меѓу власта и опозициските политички противници по повеќемесечните социјални, студентски блокади кои добија поддршка од граѓаните на Србија.
Собранието на градот Зајечар има 50 советнички места, а право на глас имаат 47.353 граѓани, кои од 7 до 20 часот гласаат на 69 избирачки места.
Собранието на општина Косјериќ има 27 советнички места, а на 29 избирачки места ќе може да гласаат 8.897 граѓани кои ќе избираат меѓу три листи – „Србија нема да ја дадеме – Александар Вучиќ“, „Руска партија – Србија во БРИКС! Слободан Николиќ“ и Обединети за Косјериќ.