На делницата од автопатот Бања Лука – Прњавор се случи тешка сообраќајна несреќа во која според последните информации загинаа три лица.
Трагедијата се случи кога автомобил „волво“ одзади удри во приколка на камион, кој стоеше на патот поради претходна несреќа.
Две деца се повредени и се згрижени во Универзитетскиот клинички центар на Република Српска.
„Камионот претходно учествуваше во сообраќајна незгода со друг автомобил. Се работи за судир со материјална штета. Поради несреќата двете возила стоеја на автопатот кога „волвото“ со голема брзина влета под приколката на камионот“, вели изворот на локалната АТВ.
Од полициската управа Бања Лука потврдија дека трагедијата се случи околу 12:50 часот.