Босна и Херцеговина денеска околу 11 часот ја потресе уште еден земјотрес со интензитет од 4,6 степени според Рихтеровата скала, а епицентарот повторно бил во близина на Зеница.
Жителите на Зеница изјавуваат дека потресот билм сличен на тој што ја погоди Зеница пред две ноќи и кој беше еден од најсилните земјотреси во изминатите 40 години, кој предизвика само помала материјална штета.
По првиот земјотрес денеска уследи и вторичен потрес.
Сеизмолошкиот завод на Федерацијата БиХ соопшти дека епицентарот на земјотресот бил на два километри длабочина и седум километри оддалеченост од Зеница.
Во некои делови на градот како последица на потресот дојде до прекин на електричната енергија, а меѓу населението повторно завладеа паника. Во страв од нови посилни потреси жителите на градот излегоа на улиците, како и пред две ноќи.
Земјотресот бил почувствуван и во други делови на БиХ, а во Сараево неговиот интензитет изнесувал три степени според Рихтеровата скала.