Мирољуб Миловановиќ, таткото на убиениот Александар Миловановиќ, денеска се појави видно вознемирен пред судскиот совет во Белград. Се сврте кон стаклото зад кое седи обвинетиот за убиство на деветмина и тогаш тешко ранетите 12 лица – Урош Блажиќ и почна да вика.
– Крени ја главата и погледни ме добро. Погледни ме добро ! – извика тој.
На прашањето на обвинителот дали Александар бил во конфликт со Блажиќ, тој одговори негативно и додаде „дека сега се во конфликт“.
– Цел живот ќе го чекам! Како татко би сакал да го осудите на доживотен затвор, но си се заколнав дека ќе се одмаздам. Ослободете го сега! – рече тој.
Тој додаде дека се приклучува на барањето обвинителство и дека бара отштета од 100.000 евра по член на семејството.
Урош и неговиот татко Радиша Блажиќ, обвинети за недозволено набавување и поседување на поголема количина оружје, на вчерашното судење ја изнесоа својата одбрана.
Урош Блажиќ на вчерашното судење првпат јавно ја изнесе својата одбрана и го призна делото, но не сакаше да зборува за убиствата.
Зборуваше за оружјето и за неговиот татко Радиша Блажиќ, тврдејќи дека не му го дал оружјето со кое се изврши масакрот и кое било пронајдено при претресот.
Тој го искористи своето право да не одговара на прашања.
Радиша Блажиќ целосно ја негираше вината, наведувајќи дека никогаш не го видел оружјето што е пронајдено и дека не знае од каде му е оружјето на неговиот син.
„Урош се однесуваше како нормален човек, не се однесуваше како лудак, да интервенирам, да го пријавам – рече Радиша Блажиќ.
Вишиот суд во Смедерево, кој го води овој процес, од безбедносни причини заседава во зградата на Специјалниот суд во Белград.
Покрај денешниот термин, судењето е закажано и за утре, како и за септември.
Урош Блажиќ е обвинет дека на 4 мај минатата година убил девет и ранил 12 лица.
Неговиот татко Радиша Блажиќ е обвинет дека го набавил и поседувал оружјето кое било пронајдено во неговата куќа и со кое бил извршен масакрот.