Полициската управа на Федерацијата Босна и Херцеговина (ФУП), го суспендираше Зоран Чегар, началникот на униформираната полиција, на 3 ноември, кој беше снимен како им се заканува на новинарките дека ќе им ги „скине грлата“ пред судницата.
ФУП соопшти дека Чегар е суспендиран согласно „Законот за полициски службеници на Федерацијата Босна и Херцеговина, без да се наруши исходот од постапката против назначениот полициски службеник пред надлежниот орган на ФУП“.
Во соопштението на ФУП не се наведуваат повеќе детали за причините и должината на суспензијата на Чегар поради, како што наведуваат, „заштита на законитоста на тековната постапка против полицискиот службеник Зоран Чегар“.
Министерот за внатрешни работи на Федерацијата Босна и Херцеговина, Аљоша Чампара, на 28 октомври испрати барање за суспензија на Чегар, поради обвинението за измама во Хрватска и нападот врз новинарите од Центарот за истражувачко новинарство во Босна и Херцеговина (CIN).
Два дена претходно, во судот во Дубровник започна судењето на Чегар поради сомневање за измама, што според хрватските закони се казнува со затворска казна до осум години.