Вработените во општата болница „Никеа“ во Пиреја, исвиркаа и избркаа околу 25 членови на неофашистичката „Златна зора“, кои се обиделе да влезат во болницата за да бараат имигранти кои се лекуваат таму, јави дописникот на МИА од Атина.
– Група од околу 25 фашисти со кошули со темна боја со знакот на Златна зора упаднаа во болницата и пред да бидат забележани, се фотографирале на влезот и во гинеколошка клиника, стои во соопштението од лекарите во болницата.
Лекарите велат дека насилниците биле принудени да си заминат „по координираната реакција од страна на болничката заедница и вербалните напади од страна на персоналот и граѓаните кои се собрале во дворот, додека администрацијата викала полиција.
– Болницата Никеа е болница и област за толеранција и грижа за сиромашните, бегалците и имигрантите. Таква била отсекогаш и таква ќе остане, истакнаа лекарите од оваа болница иги повикаа сите здравствени работници, роднините на пациентите и локалните жители да учествуваат на антифашистичкиот протест, што тие го организираат во сабота во областа Периволаки.
Ова не е првпат припадници на „Златна зора“ да спроведуваат рации во болници и да им ги проверуваат документите за престој на приватно ангажираните медицински сестри и пациентите.