Хрватскиот премиер Андреј Пленковиќ изјави денеска дека секој иден мировен договор за Украина мора да го заштити територијалниот интегритет на земјата и да обезбеди гаранции што ќе ја одвратат Русија од понатамошна агресија.
Пленковиќ напиша на X дека учествувал на состанокот на Европскиот совет и таканаречената коалиција на доброволни сојузници на Украина кои разговарале со американскиот претседател Доналд Трамп во Вашингтон за патот кон мирот.
„Нагласив дека е важно да се постигне праведен и долготраен мир што ќе го заштити суверенитетот и територијалниот интегритет на Украина и ќе ѝ обезбеди цврсти безбедносни гаранции. Со тоа, придонесуваме за европската и глобалната безбедност“, рече Пленковиќ.
„Сите се залагаме за што поскоро завршување на војната што одзеде голем број животи“, истакна хрватскиот премиер и додаде дека ќе продолжи сеопфатната поддршка за украинскиот народ и претседателот Зеленски.