Известувачот на Европскиот парламент за Србија – Тонино Пицула, денес оцени дека владата во Србија практикувала злоупотреби, насилство и притисок врз граѓаните, активистите и новинарите за време на локалните избори што се одржаа вчера.
Пицула на социјалната мрежа X изјави дека нема неважни избори во демократијата, но важно е тие да не бидат компромитирани од злоупотреби, насилство и притисок врз граѓаните, активистите и новинарите.
„Сето ова, по којзнае кој пат, повторно го практикуваше владата на локалните избори што се одржаа во Србија“, напиша тој.
Порано денес, генералниот секретар на Европската демократска партија и пратеник во Европскиот парламент, Сандро Гоци, реагираше на изборите во Србија и ја повика Европската комисија да одговори на насилството и заплашувањето за време на локалните избори во Србија.