Централната изборна комисија на БиХ денеска ги закажа парламентарните избори во земјата кои ќе се одржат на 12 октомври.
Босанските граѓани ќе гласаат за нов состав на тричленото Претседателство, за долниот Претставнички дом на државниот Парламент, за Собранието на муслиманско-хрватската Федерација БиХ и за парламентите на 10-те кантони во Федерацијата, како и за Народното собрание на Република Српска. Истовремено, ќе бидат избрани и нов претседател и двајца потпретседатели на Република Српска.
Во избирачкиот список моментно се регистрирани 3.231.000 граѓани со право на глас. Организирањето на изборите ќе ја чини државата 4,5 милиони евра, кои се предвидени со буџетот.