Претседателот на Република Кипар Никос Анастасиадис и лидерот на кипарските Турци Мустафа Акинџи денеска повторно ќе се сретнат во обид да постигнат согласност во однос на прашањата, поврзани со управувањето и имотите на двете етнички заедници во рамки на новата држава на островот, пишува весникот „Филелефтерос“.
Извори за весникот изјавија дека денешните разговори ќе бидат показател за следните чекори и политичките процеси во северниот дел на Кипар, контролиран од кипарските Турци.
На последната средба двајцата лидери констатираа напредок во однос на две преговарачки глави, управувањето и имотите. Од сличностите во нивните позиции ќе зависи и продолжувањето на преговарачкиот процес.
Весникот пишува дека во Парламентот во Северен Кипар почнува дебата за програмата на коалициската влада, која се очекува в среда да добие доверба.