По мини реконструкцијата во грчката Влада, соопштена во петокот, новите министри, вкупно шест, положија свечена заклетва пред претседателот на Грција, Прокопис Павлопулос и во присуство на премиерот Алексис Ципрас, јави дописничката на МИА од Атина.
Дел од министрите положија религиозна, други граѓанска заклетва.
Од алтернативен, Јоргос Катругалос е новиот министер за надворешни работи на Грција на местото на Алексис Ципрас кој освен премиер беше и шеф на грчката дипломатија. На позицијата алтернативен МНР за европска политика, доаѓа Сиа Анагностопулу, пратеничката од СИРИЗА која беше и известувач за нацрт законот за ратификација на Договорот од Преспа, кога беше претставен во грчкиот Парламент.
Од другите промени во грчката Влада, на местото на Катерина Нотопулу, која е кандидат за градоначалник на Солун од редовите на СИРИЗА, заменик министерка за внатрешни работи, надлежна за Македонија и Тракија е Елефтерија Хаѕигеоргиу.
Насос Илиопулос, од заменик министер за труд и социјална заштита е кандидат за градоначалник на Атина, па така на негово место доаѓа Консантинос Баркас.
Промени има и во Министерството за транспорт и инфраструктура каде што заменик е Танос Мораитис и во Министерството за миграциска политика, исто така на позицијата заменик министер доаѓа Ангелос Толкас.