Новоизбраниот претседател на Црна Гора, Јаков Милатовиќ даде интервју за ТВ Дневник Нова. Тој рече дека е европски политичар кој силно го победи режимот.
„Во неделата имаше победа во Црна Гора, над режимот кој беше надминат. Јас сум човек кој е европски политичар. Затоа го победив режимот толку силно. Мислам дека Црна Гора ја чека уште посилна европска иднина и дека никогаш нема да се вратиме на реториката од минатото, чиј симбол во Црна Гора беше Ѓукановиќ, кој се појави во воените години од 1990-тите“, изјави Милатовиќ.
Новиот црногорски претседател се осврна на сликите од Црна Гора по неговата победа, кои се однесуваат на српски знамиња, три прста во воздухот и извици „ова е Србија“.
„Сите гледаат што сакаат да видат. Видов достоинствена победа со црногорско и европско знаме. Замислете, после 34 години беше соборен квазидиктаторски режим. Тоа беше историски ден за Црна Гора. Токму Ѓукановиќ беше на чело на Црна Гора кога ние како држава газевме во евроинтеграциите. Да сакаше денеска ќе бевме во Европската Унија, но беше спротивно. Европска Црна Гора победи во неделата“, вели Милатовиќ.
Новинарот го потсети Милатовиќ дека за време на кампањата бил поддржан од Српската православна црква (СПЦ), политичари силно поврзани со просрпските струи во Црна Гора и Србија, но и од осудениот воен злосторник Воислав Шешељ. Милатовиќ се насмеа и рече дека повеќе пати се оградил од Шешељ.
„Ја потсетив црногорската и регионалната јавност дека тоа беше воениот другар на Шешељ Ѓукановиќ. Шешељ беше на првата инаугурација на Ѓукановиќ во 1998 година. Знаете, господинот Шешељ и јас сме од два различни света“, коментира Милатовиќ.
Во врска со поддршката на Српската православна црква, Милатовиќ рече дека Митрополијата на Црна Гора и Приморјето била подложена на тортура од режимот на Мила Ѓукановиќ. Тој рече дека токму Ѓукановиќ пред неколку години го вовел прашањето на СПЦ во секојдневната црногорска политика.
„Прашањето за црквата е ставено „ad acta“. Ова е многу важно затоа што сега ќе имаме можност силно да се фокусираме на суштински теми кои се од интерес за граѓаните. Црна Гора беше окарактеризирана од Европската комисија како заробена држава“, вели Милатовиќ и додава дека неговата цел е да ја забрза европската интеграција и да го подобри животниот стандард во земјата.