Најмалку шест деца на претшколска возраст се хоспитализирани во подгоричката болница поради стомачни тегоби, предизвикани од бактеријата салмонела, со која најверојатно се заразиле во градинка, јавија црногорските медиуми.
Институтот за болести кај децата соопшти дека се хоспитализирани шест деца со силни стомачни проблеми.
Кај три деца е изолирана салмонела, а за другите анализите се во тек и се чекаат конечните резултати.
Директорката на градинката Наташа Томовиќ не сакаше ниту да потврди, ниту да демантира дека меѓу заразаните има деца кои одат во таа установа, додека родителите на заболените деца тврдат дека тие се заразиле во градинката.