Вишото јавно обвинителство во Смедерево ја прошири истрагата против Р.Б од Младеновац, татко на У.Б., кој е осомничен за масовно убиство на 4 мај во селата Мало Орашје и Дубона кај Смедерево и Младеновац, поради основи на сомнение дека извршил злосторство против општата безбедност, дознава српски Курир.
– Наредбата за проширување на истрагата против обвинетиот Р.Б е резултат на утврдени факти и прибрани докази во досегашниот тек на истрагата, а со оваа наредба тој се товари дека набавил поголема количина огнено оружје и распрскувачки материи, кои потоа биле небезбедно чувани на поткровјето од куќата во која живеел обвинетиот У.Б., неговиот син, што му овозможило да го поседува тоа оружје, меѓу кои и автоматски пушки и пиштоли, кои потоа У.Б. ги користел при извршување на кривичното дело тешко убиство кога уби девет лица и се обиде да убие уште 13 – се наведува во соопштението на Вишото јавно обвинителство во Смедерево.
За околностите кои му се товарат со наредба за проширување на истрагата денеска беше сослушан обвинетиот Р.Б.
Против Р.Б веќе се води истрага за кривично дело недозволено изработување, држење, носење и тргување со оружје и распрскувачки материи, а од моментот на апсењето е во притвор.
Во притвор е и У.Б., против кого се води истражна постапка поради постоење основи на сомнение дека сторил кривични дела тешко убиство, недозволено изработување, држење, носење и тргување со оружје и распрскувачки материи и грабнување како неовластено користење на туѓо возило.
Нивните роднини Б.Г. и Г.Г., се во притвор поради постоење основи на сомнение дека нелегално изработуваат, чуваат, носат и тргуваат со оружје и распрскувачки материјали.