Основното јавно обвинителство на Подгорица денеска поднесе кривични пријави против тројца лидери на опозицискиот Демократски фронт, поради „насилничко однесување и загрозување на безбедноста“.
Обвинителството соопшти дека ги повикало пратениците Милан Кнежевиќ, Милутин Ѓукановиќ и Бранко Радуловиќ да дадат изјави во својство на осомничени.
Обвинението е поднесено по пријава на тројца пратеници на владејачката Демократска партија на социјалистите (ДПС), кои ги обвинуваат опозициските лидери за вербален напад врз нив.
– Врз основа на добиените сознанија, Обвинтелството издаде налог за покренување кривична пријава против пратениците М.К., М.Ѓ. и Б.Р. поради кривичното дело насилничко однесување и загрозување на безбедноста, се наведува во соопштението.
Тројцата опозициски лидери ги отфрлаат обвиненијата изнесени против нив дека во средата ги навредувале пратениците на ДПС на национална основа.