Високиот претставник на меѓународната заедница во БиХ, Валентин Инцко, го поздрави договорот меѓу политичките партии за формирање нови влади на државно и федерално ниво, истакнувајќи дека сега е време за сериозна работа.
Тој изрази жалење што повеќе од пет месеци беа загубени на разговори за поделба на позициите и нагласи дека сега не е време за „самобендисаност“ туку за сериозна работа, пренесе агенцијата Фена.
-Граѓаните очекуваат од владите да го надоместат загубеното време и да почнат да ги решаваат сериозните предизвици со кои земјата и нејзините граѓани се соочуваат, посебно во областа на враборувањето, владеењето на правото, борбата против корупцијата и напредокот на патот кон евроатланските интеграции, наведе Инцко, а соопшти неговата канцеларија.
Високиот претставник укажа дека сега, кога коалициските партнери се договорија за поделба на ресорите, крајно време е да се почне со вистинска работа, а тоа е служење на граѓаните.
-Доколку политичките партии бидат искрени во ветувањата дадени до граѓаните, досегашниот начин на водење на политиката во БиХ мора радикално да се промени, а потребата на граѓаните за подобар живот мора да се стави пред интересите на политичките партии и политичарите, истакна Инцко.
Завршувањето на процесот на формирање власт во БиХ го поздрави и хрватскиот европратеник и потпретседател на Одборот на ЕП за надворешни работи Андреј Пленковиќ.
-Добро е што конечно се формира власта во БиХ, бидејќи тоа беше и своевиден апел од ЕУ по октомвриските избори, изјави тој за „Аваз“.