Европската полициска канцеларија во најновиот извештај нагласува дека Црна Гора спаѓа во рангот на „најважните перални на пари“ во светот.
Еуропол констатира дека земјата е важна „перална“ на пари, бидејќи нелегално стекнатите пари на тајкуните и наркокартелите се уфрлуваат во легалните текови и работења, пишува подгоричкиот весник „Дневне новине“.
– И натаму се испитува какви и колкави врски вака стекнатиот капитал има со државниот врв и со коруптивните активности. Под лупа посебно се руските тајкуни, чие работење со години и е сомнително на европската полиција – се вели во извештајот.
Според Еуропол, нелегално заработените милиони во Русија често завршуваат како уредни инвестиции во земјиште, хотели или вили на црногорското крајбрежје.
Еуропол констатира и дека Црна Гора се наоѓа на крстосницата на патиштата на дрогата и е дел од т.н. балканска нарко – рута.
– Црна Гора им е интересна на криумчарите на дрога поради слабиот надзор, но и можноста за подмитување на царинските и полициските контроли – се наведува во извештајот.