Црногорската опозиција ги повика своите приврзаници да излезат на улиците со барање за преразгледување на резултатите од претседателските избори, кои се одржаа на 7 април.
Ова на својот Фејсбук профил го напиша еден од опозициските лидери Небојша Медоевиќ, додавајќи дека освен институционалните механизми опозицијата ќе употреби и други методи на борба.
– Секој граѓанин кој знае во каква состојба се наоѓаат нашето општество и државата, треба да ја заштити слободата и демократијата, честа и достоинството. Започнува „црногорската пролет“. Ќе се видиме на улиците, пишува на профилот на Медоевиќ.
Тој нагласи дека Демократскиот фронт нема да биде соучесник во создавањето на „неслободно,
нестабилно и неефективно општество“.