Црногорското Министерство за надворешни работи прогласи за персона нон грата шестмина дипломати на Амбасадата на Руската Федерација акредитирани во Црна Гора.
„Министерството за надворешни работи прогласи шестмина дипломати на Амбасадата на Руската Федерација акредитирани во Црна Гора за персона нон грата, поради активности што се спротивни на Виенската конвенција за дипломатски односи и односи на взаемно почитување и уважување меѓу двете земји“ соопшти Министерството преку Твитер.
РТЦГ потсетува дека во денешната акција на Агенцијата за национална безбедност беа уапсени неколку лица, како што потврди премиерот Дритан Абазовиќ. Тој изјави дека акцијата е од меѓународен карактер и дека имињата може да ги соопшти само Специјалното државно обвинителство.
– Акцијата на Агенцијата за национална безбедност против неколку лица осомничени за создавање криминална организација и шпионажа ја враќа довербата на граѓаните и партнерите во таа институција, тврди претставникот на Демократската партија на социјалистите, Предраг Бошковиќ.