Власите на Босна и Херцеговина почнаа да им ги укинуваат визите на граѓаните на Пакистан и Бангладеш кои доаѓаат под превезот на странски работници, а всушност илегално одат во Хрватска и го продолжуваат патот кон земјите од Европската Унија.
Поради недостигот на работна сила, бројот на пристигнувања на државјани на Непал, Бангладеш и Пакистан кои добиваат работни дозволи во БиХ е зголемен во последните години.
Иако многу од нив остануваат вработени, некои се префрлени во Хрватска преку шверцерски синџири и го продолжуваат своето патување кон другите членки на ЕУ.
Службата за странци во средата извести дека на 39 пакистански државјани им се укинати работните визи, додека 14 државјани на Бангладеш се во постапка.
Полициската агенција наведува дека илегалните мигранти плаќаат големи суми пари на посредници или на самите работодавци за да им обезбедат работни дозволи и визи за легален влез во Босна и Херцеговина.
Службата ги повика работодавците да увезуваат странски работници исклучиво преку овластени агенции и предупредија дека во спротивно ќе треба да ги платат трошоците за сместување во центарот за имиграција и депортација од Босна и Херцеговина.
Босна и Херцеговина издаде 3.230 работни дозволи во првите шест месеци од 2024 година, а оваа бројка се зголемува секоја година.