Рускиот претседател Владимир Путин денеска изјави дека непријателите на Москва веројатно сфаќаат како би завршил евентуален напад „со нуклеарен елемент“ против Русија или руските сили, објавија британските медиуми.
Коментарите на Путин дојдоа откако руската Служба за надворешно разузнавање (СВР) претходно во текот на денот изрази загриженост за можните испораки на елементи за технологија на нуклеарно оружје за Украина од Велика Британија и Франција.
Руското Министерство за надворешни работи вчера предупреди за ризикот од директен судир меѓу државите со нуклеарно оружје.
Предупредувањето на Министерството за надворешни работи следеше по изјавата на СВР.
СВР не ги поткрепи своите тврдења со докази. Француската амбасада во Москва соопшти дека руските тврдења се „очигледна лага“.
Русија ќе ги информира САД за обидите на Украина да се здобие со нуклеарно оружје, изјави советникот за надворешна политика на Кремљ, Јуриј Ушаков.
Ушаков, цитиран од руските медиуми, рече дека ова ќе влијае на позицијата на Русија во преговорите за решавање на конфликтот во Украина.