Вториот ден од Светскиот самит на донер што се одржува викендов во Скопје ќе го отворат амбасадорот на Република Турција Омур Шолендил, претседателот на Стопанската комора на Македонија и Турција (МАТТО) Туна Ејуп Кахвеџи и министерот без портфељ во Владата на Република Турција задолжен за билатерални односи Фуркан Чако.
Како што соопшти МАТТО, на Самитот учествуваат околу 100 бизнисмени од 20 земји, но најмногу од Република Турција, а изложена е и донер-опрема од 12 производители.
Стопанствениците го промовираат деловниот потенцијал на оваа гранка и бараат партнери за заеднички вложувања во Република Македонија, како и македонски партнери за инвестирање во регионот.
Самитот го организира Меѓународното здружение на ресторани кои подготвуваат донер, снабдувачи и производители на донер-опрема со седиште во Република Турција.
Здружението брои 250.000 членки и ја преставува светската индустријата на донер со годишен обрт од еден трилион долари и 500 милиони оброци дневно.