Принцот Вилијам, наследникот на британскиот престол, има нето вредност од 1,6 милијарди долари според новите годишни сметки од Sovereign Grant, претркувајќи го својот татко, кралот Чарлс III.
Принцот Вилијам ја добил таа сума благодарение на Војводството Корнвол, приватен кралски имот што го презел во 2022 година, кога Чарлс станал крал. Според објавените податоци, Вилијам остварил приватен приход од 28,5 милиони долари во фискалната 2025-2026 година, а откако станал принц од Велс, наводно платил повеќе од 26 милиони долари даноци.
За разлика од него, Чарлс сè уште не го достигнал статусот на милијардер. Според најновата листа на богати на Sunday Times, личното богатство на 77-годишниот крал се проценува на 846 милиони долари, што е речиси 40 милиони долари повеќе од претходната година.
Војводството Корнвол е главен извор на приход на Вилијам и ги опфаќа официјалните, хуманитарните и приватните активности на него, Кејт Мидлтон и нивните три деца. Имотот е основан во 1337 година од страна на кралот Едвард III за да обезбеди приход за наследникот на престолот, а денес опфаќа околу 205 квадратни милји земјиште во повеќе од 20 окрузи низ Обединетото Кралство.
Според „Тајмс“, Вилијам планира да продаде 20 проценти од војводството во текот на следните десет години за да насочи повеќе од 670 милиони долари во проекти за домување и заштита на природата. Во својата изјава тој рече:
„Можеме да направиме толку многу добро. Се обидувам да дадам приоритет на работите што ќе го подобрат животот на луѓето што живеат во тие области“, рече принцот.
Чарлс владееше со Војводството Корнвол 53 години, од 1969 година до септември 2022 година, кога му ја предаде контролата на Вилијам по смртта на кралицата Елизабета II. Откако дојде на престолот, тој наследи и дел од приватниот имот на покојната кралица, вклучувајќи го замокот Балморал и имотот Сандрингем.