Во кафуле во скопската населба Аеродром направен е мурал посветен на прерано починатиот музичар Андреј Ѓорѓиески од „ДНК“ кој го загуби животот во страотната трагедија во кочанската дискотека „Пулс“. На ѕидот е нацртан неговиот лик, а испишани се и дел од стиховите на песната „Круг“, која била омилена на сопственикот на локалот.
„Заедно сите растевме, се смеевме, журкавме до бесвест, тагувавме, плачевме… Љубовта кон Андреј и ‘ДНК’ секојдневно ја пренесував низ нивните песни во кафулето“, споделува сопственикот на локалот, Дамјан.
Тогаш одлучил да ги спои трите нешта кои најмногу му значат: локалот, Андреј и омилената песна „Круг“.
„Андреј ќе живее вечно. Како низ песните, така и преку муралот кој ќе нè потсетува на неговото дело и ќе ни буди убави спомени“, додава тој и упатува благодарност до уметникот и неговата екипа за поддршката и реализацијата.
