Последните денови холивудскиот свет го потресе веста за смртта на легендарниот актер Џин Хекман и неговата сопруга Бетси Аракава, кои починаа во период од една недела. Нивните тела беа пронајдени во семејната куќа во Санта Фе на 26 февруари, а истрагата покажа дека причините за смртта е природна, но под крајно невообичаени околности.
Според истрагата, Бетси Аракава умрела прва, околу 11 февруари, од хантавирус пулмонален синдром, ретка и сериозна болест која ја пренесуваат глодари. Иако имаше првични шпекулации за можни други причини, аутопсијата потврди дека вирусната инфекција била фатална. Една недела подоцна, на 18 февруари, почина и Џин Хекман, чиј пејсмејкер ја забележа својата последна активност тој ден. Причината за неговата смрт била хипертензивна и атеросклеротична кардиоваскуларна болест, додека напредната Алцхајмерова болест била наведена како дополнителен фактор.
Инспекторите изјавија дека поради здравствената состојба на Хекман, не е можно со сигурност да се утврди дали тој знаел за смртта на неговата сопруга во тие денови. Отежителна околност била загубата на нивното куче Зина, кое било пронајдено мртво од дехидрација. Двете преостанати кучиња беа живи, едното во бањата до телото на Аракава, а другото надвор.
Телата биле откриени кога работник за одржување дошол на имотот и откако не добил одговор, го алармирал обезбедувањето. Влезната врата била отклучена, а во куќата немало знаци на насилно влегување или грабеж. Хекман бил пронајден во неговата соба, додека Аракава лежел во бањата, покрај вклучен грејач и отворено шише со лекови со истурени таблети на шанкот.
Форензичките наоди укажуваат дека телата биле во фаза на распаѓање и мумификација, што уште повеќе го отежнувало прецизното одредување на времето на смртта. Анализата на мобилните телефони пронајдени во куќата не даде нови информации – немаше докази дека Хекман се обидувал да повика помош или користел технологија во последните денови.
Веста за смртта на познатиот актер и неговата сопруга привлече големо внимание во јавноста. Нивното семејство објави соопштение во кое ја изразува својата тага и нагласуваат дека Хекмен, освен што е почитуван ширум светот, им бил и сакан татко и дедо.
Џин Хекман, двократен добитник на Оскар, ќе остане запаметен по неговите улоги во филмовите како „Француската врска“, „Разговор“ и „Непростено“, додека Бетси Аракава беше талентирана класична пијанистка. Иако причините за смртта се разјаснети, необичните околности под кои починале оставаат многу мистерии кои уште долго ќе ја интригираат јавноста.