Над 50-тина баскер изведувачи од светот, акробати, жонглери, танчери, магионичари, кловнови и музичари се дел од програмата на 12. издание на фестивалот „Баскерфест“ што од денеска до 25 јуни ќе се одржува во Скопје.
Покрај улични артисти и жива музика, посетителите ќе може да уживаат во претстави, пантомима перформанси, улични танчери, креативни работилници, ликовни изложби, базар на ракотворби и работилници со артисти.
Манифестацијата се одржува на три локации на плоштадот „Македонија“.
Според Сандра Темова, еден од организаторите, најголемата убавина на фестивалот е што е наменет за посетители и граѓани од сите возрасти, бидејќи нуди забава за сите.
– Имаме детска работилница што започнува од 18:30 часот. Настапите на артистите започнуваат од 19:00 часот и траат се до 23:00 часот, додека музичката програма започнува од 22:00 и трае до 01:00 часот, изјави Темова.
Посочи дека ново годинава е што првпат ќе има шоу со балони, како и интересен спектакл на група музичари со ударни инструменти од Романија и повеќе циркуски настапи.