Аргентинските власти до американските безбедносни служби доставиле список со околу 35.000 лица на кои треба да им биде забранет влез на стадионите за време на натпреварите на аргентинската репрезентација на Светското првенство.
Меѓу лицата на списокот се наоѓаат и околу 13.000 татковци кои не ги исполнуваат законските обврски за плаќање алиментација.
Аргентинската министерка за национална безбедност Алехандра Монтеолива соопшти дека базата со податоци е доставена до американското Министерство за внатрешна безбедност, ФБИ и други меѓународни безбедносни агенции во пресрет на натпреварите на аргентинската селекција.
„На оние кои не плаќаат алиментација повеќе нема да им биде дозволен влез на стадионите“, изјави Монтеолива.
„Доколку не ги исполнувате своите законски обврски, нема да можете да присуствувате на натпреварите“, додаде таа.
Аргентина во нокаут-фазата на Светското првенство ќе игра против селекцијата на Зеленортските Острови, а натпреварот е закажан за 4 јули.