Врнежите од дожд и топењето на снегот од Осоговијата го зголемија водостојот на Оризарска река кај Кочани и на реката Брегалница.
Според податоците добиени од Водостопанското претпријатие „Брегалница“ од Кочани, езерото Градче крај Кочани е на прелив од надојдените води на Голема и Мала река со топењето на снегот од Осоговијата. Со тоа е зголемено нивото на Кочанска река.
Надојдените води од реките и водотеците на Брегалница и Каменичка река придонеле да порасне и нивото во акумулацијата Калиманци, каде што според проценките има акумулирано околу 90 милиони метри кубни вода.
Што се однесува до состојбата на Злетовска река во општина Чешиново-Облешево, таа е ставена под контрола. Механизација изминатите неколку дена работеше на чистењето на коритото за да не дојде до нејзино излевање и поплава на населените места Лепопелци, Новоселани, Жиѓанци и Уларци.
