Измените на Законот за високо образование и за државната матура се одложени за септември 2016 година, соопшти премиерот Никола Груевски.
Дотогаш, Владата ќе се консултира со сите засегнати страни со цел да се слушнат сите мислења и да се направат темелни консултации.
– Одлагањето на државната матура е затоа што од декември се пријавува матурата и имавме прекраток период за промените што сакавме да ги постигнеме, затоа што ни треба во меѓупериодот и дијалог, така што има доволен простор да се вклучат сите заинтересирани страни и да се разговара со сите, да се слушнат сите мислења и да се направат темелни консултации за на крај да се донесе најсоодветното решение”, рече Груевски.
Што се однесува до Законот за високо образование, Груевски рече дека и за него ќе се направат максимални напори да бидат вклучени сите оние на кои се однесува законот и да се слушнат сите мислења, а во заеднички консултации да се дојде до најдобрите можни решенија.
Студентите и професорите протестираа против измените на Законот за високо образование со кои се предвидуваше воведување на државен испит за студентите. Средношколците и наставниците исто така протестираа против новиот начин на полагање на државната матура и екстерното тестирање.