Во фоајето на Македонската опера и балет, вечерва во 20 часот, ќе се одржи вокален концерт по повод 80-годишнината од животот и творечката дејност на македонскиот композитор Љубомир Бранѓолица, а воедно ќе биде промовирана и збирката „Вокални дела на Љубомир Бранѓолица“, чиј издавач е Сојузот на композиторите на Македонија.
На концертот ќе настапат вокалните солисти при МОБ: Марика Поповиќ, Невен Силјановски, Александра Лазаревска и Ана Ројдева, во пијано- придружба на Јанинка Невчева и Елена Сиљаноска, кои ќе изведат дел од вокалното и оперско творештво на авторот. Модератор на концертот ќе биде музикологот Дојрана Прокопиева.
Композиторот, пијанист и музичкиот писател Љубомир Бранѓолица е роден во Херцег Нови во 1932 година, и речиси целиот свој живот го посвети на музичката уметност во Македонија, оставајќи траен белег во нејзината музичка историја.