Во организација на Општина Велес денеска во Младинскиот парк се одржа традиционалната културна манифестација „Велигденско јајце“.
Од продажните штандови посетителите имаа можност да купат по симболични цени интересно декорирани и обоени велигденски јајца.
На манифестацијата учествуваа сите основни и средни училишта од Велес и околината, Ученичкиот дом „Лазар Лазаревски“, Државното училиште за деца со посебни потреби „Маца Овчарова“, Детската градинка „Димче Мирчев“, членовите на Здружението на лица со церебрална парализа, Активот на жените пензионерки и Организација на жените од Велес.
Од оваа година манифестацијата доби и меѓународен карактер, а првпат продажни штандови имаа претставници од Општина Пробиштип, од Пустец, Република Албанија и збратимените градови од Ужице и Сомбор, Република Србија, Свиштов,Република Бугарија и Слобозија, Република Романија.
– Самото присуство на петте градови пријатели на општина Велес говори дека оваа културна манифестација оди на повисоко меѓународно ниво и ние сме задоволни од постигнатиот успех, истакна градоначалникот на Општина Велес, Славчо Чадиев.
Средствата кои ќе се соберат од продажните штандови, општината ќе ги донира на локалната црковна Народна кујна.