Ивица Андонов од Велес го фати осветениот крст во реката Вардар. Тој беше еден од 59-те православни верници кои влегоа во ладните води на Вардар во Велес.
Андонов рече дека е многу среќен што го фатил крстот на овој голем празник и дека од 15-годишна возраст секоја година се фрлал по крстот во Вардар за Водици. Ивица, кој има 27 години, е невработен, оженет и има едно дете.
– На сите верници им посакувам во оваа година многу среќа, здравје и работа, порача Андонов. Од владиката Агатангел тој на подарок прими златен крст и библија, а од Општина Велес ДиВиДи.
Андонов со своите другари во наредниот месец носејќи го светиот крст ќе ги посети и благослови за среќа домовите на православните христијани во Велес.
Празникот Богојавление-Водици утрово започна со Архиерејска Божествена Литургија во црквата „Свети Спас“ со која чиноначалствуваше Митрополитот Повардарски Агатангел во сослужение на свештенослужители од Велес.
По завршувањето на Литургијата се формира литија од Црквата „Свети Спас“ до Мало мовче, а каде што се изврши осветување на водите на реката Вардар, а по што владиката Агатангел го положи крстот во водите на реката Вардар.