По повод 17 Март-Денот на Црвениот крст на Македонија и Ден на доброволно крводарување, Општинската организација на Црвен крст од Велес денеска во Ликовниот салон ги врачи традиционалните плакети и признанија на најхуманите крводарители во Општината.
Велешани надалеку се познати по својата хуманост, а најголем доказ за тоа е годинешното второ место по дарување крв на ниво на Македонија. Велешките крводарители и покрај тешката економска положба, сепак не забораваат да бидат хумани, истакна д-р Милчо Трајков претседателот на Црвениот Крст на Република Македонија и претседател и на Општинската организација од Велес.
Оваа година се доделија плакети во знак на благодарност за унапредување и омасовување на крводарителството по неколку основи. За исполнувањето на Општинскиот и Републичкиот план за крводарителство во 2012 година благодарница им се додели на: ЈП „Македонија-Пат“ подружница Велес, ОСУ „Јовче Тесличков“, Факултет за туризам и организациони науки-дисперзирани студии во Велес, Населба Чашка и на дипломираниот психолог во ООУ „Кирил и Методиј“, Билјана Митева.
На свеченоста беа доделени плакети за 100-то, 75-то и 50-то крводарување.
Според статистиката, во 2012 година во Велешкиот огранок на Црвен Крст собрани се вкупно 4.076 крвни единици со што годишниот план од 1.861 крвни единици е остварен со 219,02 отсто, во 32 акции за доброволно крводарување од кои 27 се теренски. Од собраните 4.076 крвни единици, 700 се од крводарители жени, а 450 се од дарители кои првпат дарувале крв. Статистички невработените велешани најмногу даруваат крв, потоа се учениците, припадниците на АРМ и студентите.