Во Центарот за јавно здравје во Струмица, од вчера, за граѓаните се достапни 900 вакцини против сезонски грип.
Според директорот на Центарот за јавно здравје во Струмица, Петре Витанов, вакцинирањето тече нормално.
-Иако интересот од граѓаните е голем, вакцинирањето се одвива нормално и секој што сака да се вакцинира од комерцијалните вакцини истото ќе му се овозможи. Цената на вакцината изнесува 800 денари и засега имаме доволно, рече Витанов.
Во Здравствениот дом во Струмица досега се вакцинирале околу 600 граѓани преку „Мој термин“.
Директорката на Здравствениот дом во Струмица, Љубица Митева, информира дека бесплатното вакцинирање оди исклучиво преку „Мој термин“, кој го одредуваат матичните лекари во координација со нив.
-Сакам да ги информирам граѓаните кои се вакцинираат кај нас дека има доволно вакцини. Вчера добивме уште 1.100 и има доволно за сите, рече Митева.
Од двете здравствени институции додаават дека е зголемена свеста кај населението дека вакцинирањето е едно од најдобрите мерки за заштита од грип. Во споредба со минатите години бројот на вакцините е скоро ист, а вакцинирањето се очекува да тече и во наредните недели.