Движењето ЗНАМ за Наша Македонија и официјално ја формираше својата Градска организација во Скопје, со што започнува нова фаза на политичко организирање во главниот град. За претседател на скопската организација едногласно е избран Мирослав Лабудовиќ, магистер по електротрехника и информациски технологии и актуелен заменик министер за енергетика, рударство и минерални суровини.
Во новоформираниот тим се вклучуваат истакнати професионалци, академици, спортисти, уметници и активисти, кои, како што велат од движењето, претставуваат интелектуалниот и граѓанскиот потенцијал на Скопје.
Меѓу нив се издвојуваат:
Проф. д-р Горан Ајдински – редовен професор на Филозофскиот факултет
Генерал Горанчо Котески – поранешен началник на Генералштабот на АРМ
Проф. д-р Билјана Андреска-Богданоска – ректор на Европски универзитет
Јорданчо Давитков – поранешен кошаркарски селектор
Љупчо Марковски – Калц – фудбалска легенда и поранешен капитен на Вардар
Проф. д-р Радмила Чрчева Николова – факултет за ветеринарна медицина
М-р Александра Цветановска – експерт по деловно право и активистка
Од Движењето порачуваат дека со оваа организација започнува „политичка борба заснована на принципи, вредности и визија“. Според нив, Скопје долго време било симбол на отпор и солидарност, но денес е соочено со проблеми како бирократија, корупција и урбанистички хаос.
„Наша цел е да го вратиме гласот на граѓаните, да изградиме платформа за нови решенија и да ја ослободиме креативната и граѓанска енергија на Скопје“, се наведува во соопштението.
Градската организација на ЗНАМ – Скопје ќе делува како „бастион на слободата, визијата и урбаната култура“, се вели во пораката на движењето, кое се дефинира како политички дом на слободни и одважни луѓе.