Пуштени се во продажба влезниците за 31-то издание на „Скопскиот џез фестивал“ кој ќе се одржува од 19. до 23. октомври во Универзална сала и Македонската опера и балет.
Влезниците за Американците Ентони Брекстон квартет и данскиот музичар Пјер Дорг и „Њу џангл оркестра“ кои ќе го отворат фестивалот се по 600 денари. За триото на бразилскиот виолинист Рикардо Херц и шпанското трио Бенавент – Ди Џералдо – Пардо кои ќе настапат вториот ден ќе бидат по 500 денари.
За перформансот на швајцарскиот пијанист Малколм Браф и неговото трио и скандинавската џез група „Атомик“ кои се најавени за 21. октомври, влезницата ќе биде 500 денари, а за концертите на џез-музичарот Пет Мартино и квинтетот на младиот саксофонист од Калифорнија, Амброуз Акинмусајр кои ќе настапат на 22 октомври се по 600 денари.
Фестивалот ќе финишира со Томаж Станко квартет од Полска и американските џез-музичари Мајлс Смајлс, Волас Руни , Лери Кориел, Рик Маргица, Џо Дефранческо, Дерил Џоунс и Омар Хаким, за кои влезниците ќе бидат по 800 денари.
Почетокот на сите концерти е во 20 часот.
Во петте фестивалски дена ќе следи и полноќна програма во „Сити хол центар“ (поранешен Хардрок) со настапи на „Ле Сахел“ од Сенегал, Ентони Џозеф и Спазм бенд, „Хајден оркестра“ од Британија и триото „Д Тинг вит Џо Мекфи“. За овие концерти влезницата е по 300 денари.
Пакет влезниците за целиот фестивал е по 2.500 денари.