Манифестацијата „Зелникот на баба“ денеска по седми пат се одржа во рударскиот град Пробиштип. Пензионерки и вредни домаќинки од 16 општини во земјава, но и од соседството, ги покажаа своите вештини и начинот како се прави еден зелник во нивните родни краеви.
Дека навистина се работи за гурмански специјалитети покажа и побарувачката, па за многу кратко време зелниците беа распродадени. Калина Манева од село Ратавица во општина Пробиштип вели дека се што имале да понудат го продале на гостите.
– Многу брзо ги распродадовме. толку многу вкусни јадења имавме, рече Манева.
Градоначалникот на општина Пробиштип, Драган Анастасов вели дека „Зелникот на баба“ е во организација на локалната самоупрaва и има хуманитарен карактер.
– Имавме навистина преубави трпези денеска од страна на учесниците. Собраните средства општина Пробиштип ги донира на семејства на кои најмногу им се потребни, рече Атанасов.
Манифестацијата е добра можност пред посетителите да се претстават ракотворби и стари веќе заборавени вештини, како што е производството на свилен конец за ткаење на кошули.
Калина Манева се уште произведува конец од свилена буба.
– Ова е свилената буба што ја одгледувале нашите баби и мајки, се користела за изработка на кошули, но денеска нема кој да ја користи, рече Манева.