Новата академска 2012/13 година стартува во понеделник на јавните и приватните високообразовни установи, информираат од Министерството за образование и наука.
Според нивните податоци, годинава се запишани приближно 17.000 нови студенти во прва студиска година, на повеќе од 400 различни студиски програми.
Од Министерството известуваат и дека има одредено зголемување на бројот на новозапишани студенти на студиските програми од областа на техничките и природно-математичките науки, што, како што велат од МОН е од особена важност за правилна распределба на бројот на студенти кои го завршуваат своето образование во Македонија.
„Министерството за образование и наука на Република Македонија, на сите студенти им посакува успешна академска година со надеж и желба за постигнување на врвни резултати во областите во кои се насочиле да го продолжат своето образование, напоменувајќи дека секое постигнување во кариерниот развој на секој млад човек е успех и напредок на целокупното општество”, се вели во соопштението од МОН.
За сите оние кои се уште не успеале да се запишат на факултет, Министерството за образование и наука известува дека третиот уписен рок на сите јавни високообразовни установи во Република Македонија е на 17-ти септември.